Le tribalh de doctorant.a ne consisteish pas solament a escríver la tèsi. Es vertat qu'entà validar lo doctorat, i a solament besonh de la tèsi e de har quauquas òras de formacion. Totun, après lo doctorat, se volem ensenhar a l'universitat, e donc vàder mèst@ de conferéncias, cau obtiéner ua "qualificacion" dens ua o mantua seccion deu CNU (Conselh Nacionau de las Universitats). Cada seccion (o disciplina / camp de recèrca) a critèris diferents, e sovent, la sola tèsi n'es pas pro; cau tanben aver hèit comunicacions scientificas en collòquis, escriut articles, etc. Es donc important de cercar cridas a comunicacion entà participar a eveniments scientifics, ideaument suu tèma de la tèsi, mes pòt tanben estar un pichon projècte a costat de la tèsi, o dens mon cas dens aqueste article, un tribalh mei ancian suu quau n'aví pas enqüèra avut l'escadença de comunicar.

---------------------------

Lire la suite...

A l'estiu de 2022, puish un còp mei a l'estiu de 2023, avoi l'escadença de tribalhar suu trobador de Sentonge, Rigaut de Barbezilh - lo purmèr còp en participar a l'organizacion de jornadas d'estudi dens mon universitat, e lo dusau còp en presentar un reportatge suu trobador per ÒCtele e France 3.

---------------------------

Lire la suite...

A la debuta de julhet  de 2023, passèi 3 dias a Nancí entà participar a ua universitat d'estiu: estón 3 dias de formacion a la comunicacion scientifica a destinacion deu gran public, mercés a conferéncias, taulas redondas, talhèrs e moments de convivéncia. Estó l'escadença d'encontrar joen.as cercaire/as, de'm perfeccionar, de presentar un talhèr de vulgarizacion que creèi l'an passat dab doctorant.as en Infocom a l'universitat Bordèu Montanha, e de sensibilizar l@s participant.as a l'existéncia de l'occitan.

---------------------------

Lire la suite...

A l'abòr de 2022, ensagèi de publicar ua cronica pertocant las relacions entre lei, territòri, lenga e societat - especiaument a perpaus de l'occitan - dens ua revista juridica en cors de creacion a l'universitat de Bordèu. Malurosament, mon article n'estó pas acceptat... E òc, la mauescaduda hè tanben partida de la recèrca, e nos cau saber càder de pès!

Las ideas que desvolopèi dens ma cronica ne son donc pas perdudas e las podoi dejà tornar desvolopar dens ua comunicacion scientifica dens un seminari de recèrca en Bretanha (article associat de paréisher) e dens un article de vulgarizacion en anglés sus Internet.

---------------------------

Lire la suite...

En seteme de 2022, avoi l'escadença d'anar assistir au IIIau Congrès Internacionau de Revitalizacion de las Lengas Indigènas e Minorizadas en Catalonha (mei precisament a Girona en Espanha e Perpinhan). Aqueth congrès estó hòrt interessant per ma recèrca e entà crear e ahortir mons hialats dens lo monde de la sociolingüistica. Lo collòquis e congrès de sociolingüistica son tanben hòrt interessants deu punt de vista de lor practica lingüistica: es sovent possible de comunicar dens mantuas lengas - en generau (dens l'espaci roman) haut o baish totas las lengas romanas, l'anglés e la lenga deu lòc d'arcuelh de l'eveniment.

---------------------------

Lire la suite...

A la debuta de l'annada 2021, e tanlèu començada la tèsi, participèri au concors de vulgarizacion scientifica "Ma tèsi en 180 segondas" (MT180), on doctorant.a.s de totas las disciplinas de la recèrca an 3 minutas, pas mei, pas mensh, per presentar lo lor tribalh a un public qui n'i coneish pas arren. 

Mercés ad aquesta experiéncia, èi comprés quauqu'arrren : m'agrada de har de la recèrca, mes m'agrada hòrt tanben de parlar de recèrca, de har de la vulgarization (çò qu'au hons, sabí dejà, puishque, com ac disi dens la mia presentacion, "abans de començar la tèsi, èri... guidaira toristica" !) 

---------------------------

Lire la suite...